كتبت روابي البناي:
كما تدرون نحن في الكويت (يالله من فضلك) شعب لا يحب التقليد والمظاهر ولا يحب التفلسف أو الهبات والفناتق والصرعات التي لا ندري من أين تطلع علينا كل يوم. الفناتق الغريبة هي التي تلتصق بنا وتقول «غصب أبي أصير فيكم يا شعب الكويت» (تدرون إحنا مميزين).. ومن الهبات المنتشرة هذه الأيام بين الشباب، وأقصد الجنسين، مسميات «ماك تشيكن» mac chicken و«تشيكن ناغت» chicken nugget.
طبعا عزيزي القارئ راح تطقك البوهه عندما تقرأ هذا الكلام وستقول إني أبالغ.
بدأت السالفة عندما كنت أتمشى مع صديقاتي في الأفنيوز، فقالت احداهن: يا حليلها هذي مو لولو! ياحليلها صايرة {ماك تشيكن}.. عدل؟
سألتها: شنو يعني؟
فأجابت: شفيج روابي إنت مو عايشه بالدنيا؟ ما تدرين يعني شنو {ماك تشيكن}؟
قلت لها: خذيني على قد عقلي واشرحي لي شنو يعني يمكن أقتنع وأصير نفسهم؟!
وبعد «حنة ورنة» مع صديقتي شرحت لي المواصفات المطلوبة للجنسين لكي يصبحوا {ماك تشيكن} وأنقلها لكم وهي:
أولا: الشباب الـ {ماك تشيكن}
طبعا الذي يقال عنه أنت {ماك تشيكن} هذا «ياب اليهده»، يعني وصل وصار شيئا عند معشر الهبات والفناتق الكويتية، لكن الذي يصل هذي «المراييل» يجب ان تكون عنده مقومات أساسية يرتكز عليها حتى يصير من حزب {ماك تشيكن}:
– لازم يكون عندك «بلاك بيري بولد»، وطبعا ما تخليه «مفصخ» يعني من دون «كفر» لأن هذا من علامات «الهلاقة»، لازم تحط له «كفر» لونه فوسفوري مميز ويلفت النظر.
– لازم يكون عندك تلفون ثاني ويجب ان يكون من نوع «نوكيا N 71» علشان لما ترتز بالكافيهات تسطرهم جدامك وتتكشخ بهم أمام الذين هم مثلك، يعني من حزبك.
– لازم يكون لك موقع خاص بك على «فيسبوك» تضع فيه صورك وانت «ياهل» وأمك تغير لك الحفاظة، وصورتك قبل أن يرشك النفط وبعد ما رشك وصرت من حزب {ماك تشيكن}.
– لازم تربي شعرك وتصير كأنك من أهل الكهف يعني «كوول» وبعض الأحيان تلبس كاب وتطلع الشعر من ورا.
– لازم تخصص ميزانية، وإذا كنت فقيرا على باب الله، وغصب تبي تصير منهم، عندك حلين يا إنك تفتح حسابا في «أرامكس» علشان تشتغل طلب من أميركا يوصلك الـ«تي شرت» بنص السعر أو مالك إلا سوق «العدساني» وتلبس تقليد ويلصقونلك اللزقة بالأوتي لأن من أساسيات الـ {ماك تشيكن} لبس تي شرتات (بولو، لاكوست، بوجي، أميركان أنجل) وطبعا النصف التحتي لازم يكون شورت أو تريننغ.
– تكرمون الجوتي لازم يكون Puma وألوان علشان لما يسطرون في الكافيه ويحطون رجلا على رجل تميزهم من جواتيهم وتعرف هذا عزوز ولا هذا عبود وغيرهم.
– في الويك إند يجب ان تكون في الشاليه وتاخذ «تان» علشان تصير {ماك تشيكن} أصلي.
– لازم تكون ماخذ رخصة مغاوص من شرم الشيخ. – لازم تكون مطيح في Free Zone خاصة في Rubablic Café وتشرب يا إما Nuttela Shake أو Ferriro Shake.
– لازم يكون عندك نظارة ريبان، طبعا أصلية مو تشتريها من عند الهندي بوجنطة، تبي تصير {ماك تشيكن} قط على عمرك ولا تدور الرخص.
– لازم تعرف تتكلم إنكليزي لأن ربعك «الماك جيكنيات» ما يتكلمون إلا إنكليزي علشان لا تفتشل.
– لازم تعرف تكتب إنكليزي معرب تدري عندك حساب في {فيسبوك} وعندك {بلاكبيري} يعني لازم تشد حيلك.
– لازم تاخذ قرض تكسر فيه ظهر أبوك أو إنك تحط كل معاشك وتشتريلك سيارة سنعة علشان لما تدش البدع وتصفطها جدام ربعك الـ {ماك تشيكن} ما تفتشل ولا تكون بورش او أودي A8 او S8 او Range Rover Sport ، وطبعا لازم يكون عندك سيارة ثانية حق الشاليه، وضروري تكون إما لاند كروزر أو باترول وتحطله تواير عراض علشان يعني إنت راعي شاليهات وراعي أرصفة وما يهمك شي إنت الدمار الشامل ولا تنس تحط بعد «الجيك الأحمر» هذا اللي بخليك توصل القمة في حزب {ماك تشيكن}.
– لازم تكون سيارتك مقيمة وأول ما تقعد بالكافيه مع ربعك تقعد تتشيحط عليهم وتقول «توه دوريه وقفتني علشان التقييم، بس قلت لهم أنا منو خلوني أمشي وخافوا».
– لازم يكون عندك بصمة دخول وخروج في لورانزينو الصالحية ونينيو وسلايدر ستيشن.
ثانيا: البنات الـ {ماك تشيكن}
– لازم حلجج يكون عوي من كثر ما تتكلمين إنكليزي لأن عيب تتكلمين عربي.
– لازم يكون لونك تان Tan على مدار السنة، وإذا ما عندكم شاليه وتبين تصيرين من الربع ما عليه.. طلعي سطح بيتكم وانفرشي وقعدي لما تحرقك الشمس، بعدين قولي حق ربعك إنك كنت بالشاليه ومسويه تان.
– لازم سيارتك تكون G Class ويفضل ان تكون بمواصفات خاصة ولون نادر، أو مزاراتي، وإذا ما قدرت على ميزانية هذه السيارات ما عليه.. تقدرين تسوقين Range Rover Sport يمشي حاله بس تعتبرين مبتدئة في الحزب.
– لازم شعرك طويل وتسوينه إما كيرلي أو Ponytail.
– إذا كنت من حزب الماكياج الأراجوزي فما راح تنجحين بالانضمام الى حزب الـ {ماك تشيكن} لأنهم ضد الماكياج الصارخ والزايد.
– طبعا لازم تتعلمين المصطلحات الغريبة الخاصة بالحزب علشان تقدرين تتعايشين مع الحدث.
– لازم تتخلين عن شفاحتج بالقز يعني لما تشوفين واحد حلو من حزب الـ {ماك تشيكن} مو على طول تروحين وتقطين نفسك عليه لأنه غلط، هذا صديق عادي ويقدر يسولف معاك، بس مو بقصد علاقة وغيرها، يعني لا تبنين أحلام جزاك الله خير.
– طبعا لازم تروحين تدورين نظارة أكبر من وجهك وتلبسينها.
– لازم تكون جنطتج تشيل أغراض فريجكم كله من كبرها، ولازم تكون يا إما {هيرمس} Hermes او {كارتييه} Cartier علشان الهلاقة للحين ماهبوا فيهم.
– لازم تتغدين كل سبت بالأفنيوز علشان تشوفين الشباب من نفس الحزب وتعرفين منو الجديد على الساحة، ويبدي مسلسل الحش لأنه الهلاقة اهم اللي يروحون الأفنيوز بالليل.
– بالعيد لازم تحنين على أبوج وأمج واللي يابوج يسفرونج لندن لأن عيب تقعدون بالكويت بالعيد والهلاقة إنكم تروحون لندن بالصيف.
– لازم تكونين من الإدارية أو جامعة الخليج والحين بادين يدشون تناتيش من الأسترالية.
– طبعا لازم كل يوم تعمين عيون اللي وياج بصبغ أضافر إيدج الفوسفوري.
مواصفات الكويتيين الـ {تشيكن ناغت}
وصف {تشيكن ناغت} chicken Nugget يطلق على الفئات العمرية الأصغر سنا يعني المراهقين من 12 وحتى 18 وتنطبق عليهم المواصفات نفسها.. لكن:
– لازم تكون سيارات السواق ( كاديلاك إسكالييد ، فورد أسود مقيمم موديل السنة ، لكزس او رنج روفر ).
– لازم يدرسون في مدارس خاصة.
– لازم يكونون في تقويم شفاف متحرك بالحلج.
– الشعر كيرلي للبنات وطويل للشباب.
– جناط فوسفورية وخيوط تترس الإييد.
وباقي المواصفات نفسها لأخوانهم من الحزب الأكبر.
أنا للأمانة ماعندي تعليق لأنه لساني إنربط من اللي قاعده أشوفه وأسمعه يصير في المجتمع الكويتي الذي انقلب حاله رأسا على عقب والسبب في ذلك التقليد الأعمى. ويا ليتنا نقلد الشيء الزين والاختراعات، فنحن للأسف نقلد الغرب فقط بالأشياء السلبية التي تؤخرنا وتقدمهم.
وأخيرا مادري شقولك عزيزي القارئ أكيد انك انصدمت مثلي وأنا أسمع هذا الكلام الفاضي اللي هابين في بعض شباب وبنات الكويت اللي أنا متأكده أنهم يعانون من فراغ نفسي وعاطفي وكل الأفرغة التي في الدنيا. لأنهم بدل ما يركزون على شي مفيد يسوونه بحياتهم يفيدون فيه نفسهم وأسرهم وديرتهم، همهم فقط كيف يلفتون نظر غيرهم إليهم، وكيف يجعلون الناس تتكلم عنهم لأنهم يعتقدون أن هذه هي المدنية، وأن هذا هو التقدم والكشخة والهاي كلاس. بس الواحد ما يقول غير الله يكون بالعون ويستر علينا بستره من الآتي لأن الآتي أعظم وأكبر، والحين أترككم في أمان الله.
ي حيــــــــــــف علىا الرِجــــــــــــــــال
بالعكس حدهم يهبلووون وكيوووت وانا وحده منهم
بالنسبه لي انا ماك جكنيه يعني مايهمني بس انا عندي bbm ‘ facebook ‘ انا من النوع الماك جكن
يعني خلصت المصطلحات و الاسامي و ما لقوا الا اسم وجبة ماكدونالدز لا و الامراهقين الاطفال تشيكن ناقيت و فرحانين باللقب و الله شيء يضحك ايش علاقة الدجاج في الموضوع الي اخترع الاسم هذا اكيد يشتغل بماكدونالدز , صيروا الي تبغوا بس عاد على الاقل اختاروا اسم عدل مو اتفه الاسامي و تصيروا مضحكة غيروا الاسم بجد كانه واحد محشش ضحك عليكم و صدقتوه , مافي هابي ميل احسن
الحمدلله ربي مكملني بعقلي
ما عمري عقلي صغر ولا لحظه عشت مراهقتي وكل شي بدون سماجات
اخوان ليش مو عاجبكم الماك جكن انا ماك جكن ماكن يعني ليش مو عابكم
ايش ماك تشكن هذا أنا والله على بالي وجبة ماك ؟!!
بصراحة تفاجأت من أشياء زي كذا
هذا اسمه ((ضعف شخصية))
واحد شخصيته مهمشة ويبي يبرزها بهالتصرفات
ياخي شفلك شيء ينفعك وينفع بلادك
حسن من هالخرابيط اللي تسوونها ضياع للوقت
والمال والمستقبل والدين والخلق
احنا والله نحب الكشخة والرزة لكن بشكل معقول
اما هالاشياء الغبية الل تسوونها ما تشرفتا كعرب
محبكم /عبدالرحمن من السعودية
انا احب اكل مالك شكين وعندن في
هههههههههههههههههههههههههه السعوديه
انا احب ماك شكين ومنهم بس ابي اعرفه ليش اختارو هذا الاسم
البلاك والملبس المركات والكشخه انا منهم واحب التصرغت الاكبيره
شفت كثير من شباب الكويت وبنات الكويت فيهم تصرفت في ماكةشكين
هههههههههههههههه الحمدالله والشكر احححححس هالحركات غبية سوووري من جد حنا هنا في السعوودية اووكي في حركات وكشخة وموضة بس مايسمموني ماك تشيكن وووشو انا ووجبة يتغدون فيني ويتعشووون
الله لايبلالانا امممين ويبعد عن مملكنتا هاذي اللفتن
بالعكسسس يهبلووون وحدددهم سسستايل
احبب هالسستايل الماك تشيكن ؛)
هههههههههههههههههههه هذي موجودة عندنا بالسعودية لكن بدون اسم وجبة الماك تشكن ونلاحظهم بالاضافة للسيارات يطلعون طلعات موترسايكل طبعا هذا الشي تولد من الشبعة الزايدة و حب التميز عن المجتمع ذو الدخل المحدود و هذا يخلق طبقية بالمجتمع مستقبلا
انا مو ضد الرزه والكشخه ولبس الماركات ولكن مانخليها اهي الشاغل الاكبر لنا
واللي يقول لو تجربون البلاك بيري راح تتغير وجهة نظركم اقوله احنا عايشين برحمه بدون البلاك بيري
من هالمصايب اللي نشوفها
اشوه ما وصل الماك تشيكن عندنا السعوديه
بس اموت واعرف شمعنه سموه (((((( ماك تشيكن )))))) ليش هالاسم بالذات يعني له قصه معينه ياليت احد يقولي ياها
Maadry wallah I’m mac chicken&im having fun;pP
سورى فى اللفظ ايه الهبل ده
شباب انتو تقولون بلاك بيرى هيلق ومادرى شنو بس انتو لو اجربونه جان صار كلامكم العكس يعني تتواصلون معا ربعكم واتحسون انكم عايشين بالدنيا ا :p
والله انا ماك شيكن وانا ماادري
لوووووووووووول
في 16-3- 2010 يعني هالسنة يبون الإسرائليين هدم المسجد الأقصى ومعاهم مخططات وذكرها الشيخ نبيل بحلقته ساعة صراحة واحنا قعد نمشي ورا هالمسميات السخيفة وتربية الشعور بدلا من اللحى الله المستعان
اااااي <<والله ..الله يستر علينا من ها المااك تشيكن والتشكن ناغتس …؟اااحسه سخاااااااااااااافه لابعد الحدوود…يعني انا كنت بشتري بلاك بيري..!بس شفت الهلااااااااااااااااااااااااااااااااااااااااااقه كلهاا عليه..؟شدعوووووووه..وووين رااايحييين ..حرب ولا حرب…!!!انا البس فسفوووري صح بس البااااااااااااااجي حددددددددده حدددددددددددددددددددددددددددددددددددددددددددددده وووووووووووووووووووووووووووووووووووووووووووووووووووووووووووووووووووووويع….يقووولوون للناس هلاقه..!!واهم اصلااااااااااااااااااااااااااااااااااااااااااا.منبع الهلااااااااااااااااااااااااااااااااااااااااااااقه..ابي ااتخيل شكل وااحد منهم؟؟ابي ابي حده حدددده ااااي شي سراااحه؟؟؟؟وووووووووووووووووووووووووووووووووووووووووووووووووووووووويع<<تطورو
والله الايمو وايـــــــــــــــد ارحم
من هالفسفوري
الله المستعان
الله يستر علينا و الله
و انا عيزت و انا اسمع الشباب ماك تشيكن و مو عارف معناها =\