كتب : خالد الشرنوبي
بلد العجايب والأسرار
بلد الحَرِّيف والبَحّار
قصص وعجايب
بتنقال وتندار
عن كفر الدوّار
ال يقول :
إنها مسكونة أشرار
وال يقول :
فلاحين غلابة وأبرار
والكل .. الكل عامل فيها نَجّار
وبيثبِّت كلامه بمسمار
ومش عارف إن كفر الدوّار
عايزة لها ميت مُسمار
وميت نَجّار!
وال ماحدش عارفه إلا واحد
ومش عَرَّاف
ولا في وادي خُوُص
مليان خفايا .. عَبَّار
كل الحكاية
إنه من كفر الدوّار
وبيعرف عنها كل الأخبار
وعارف طريقتها
وكلامها في الحوار
وعارف كل حتة فيها
من الميزانة .. للسعرانية
للسناهرة .. لسيدي شحاتة
للمهاجرين .. لشارع الجيش
لسوق الطِير والخضار
وفي كل منطقة
مِتسَيَّط فيها
عيلة ودار
وياعـيني
يا عيني لو فيه عركة ولّا تار
بيكون من غير ضرب نار
بس فيه تِلت
وسِكِّينَة شَطْ
وطِيِرة ومُنشار
موجودين في جوار
وكل حارة وبيت ومزار
دُوُلَة ال بيكمِّلو المشوار
وساعتها
تتمنى تكون انضربت بالنار
ولا إنك تتقطَّع على ايد جزَّار
سيبنا من العراك
ويا للّا بينا نشوف
ال بيحصل ورا الأسوار
يعني في الغيط
والدنيا ضَلْمة مش نهار
يتلمو الصحبة الأضرار
ال مضروب بِشْلَة
وال بنطلونه من غير زُرار
والكل قاعد مِتْوتّر ومِحْتار
ال معاه تُمْناية
وال معاه باكِتّة
وال جايّ على قفا حُمار
ويِدَوَّروها الحِلوِّين
ويبَخرّو القَعْدة
بالدُخان والغُبار
وبعد ما يِتعامْلُو
تُطْلُب معاهم بجوافة
دُوقهَا مَرَّار
يِجِيبُوها من نفس الغِيط
من الأشجار
وبعدين تِتْوزَّع الأدوار
ويقوم “المَكَنَـة” مِـسَلِّم نفسه للمدار
ومش مظلوم
ما هُوُ عارف آخر التيار
يِهِيجو عليه
وتِحصَل بلاوي
وفِتَن وأضرار
وبعديـن
تِنفَضّ الصُحْبَة
وييجي الندم والأسف
والمرار
والحَسْرة في جو التكرار
ويــا رب سامحني
وما هـرجَع أنساق
ورا الفراغ الغدّار
ولا أبوس جَذْمِة صاحبي
عشان يلاغيني
بعُقب سيجار
ولا أجيب حِنَّة من عند العَطّار
ولا مِلُوخية ناشفة أحرقها في النّار
ولا صِدر ورقة ونزوة بأحبار
ولا كِدبة مايعة تجيبلي العار
ولا أقلِّب شقا أبويا .. وينهار
وفي كل مرة بتسترني يا سَتّار
وتِلحقنِّي من الضياع والدمار
ياما نفسي أدوق معنى العَمَار
والحب والخير والإستقرار
وبعـديــن
يبكي كتير ع ال عمله
ويـبان عليه الانكسار
ومع كل ده .. ومع القرار
ومع التوُبة والندم الاستغفار
تلاقي صاحبنا ملهوش كِلمة
وقام تاني يوم
عايد لليالي كفر الدوّار
وفَلَت العِيَار
أســــفي !
جميل جدااااا
بسم الله والصلاه والسلام على رسول الله وبعد اما عن كفر الدوار مثل اى بلد فى العالم الخير والشر المتفوق والفاشل المحترم والضايع عندما نبحث فيها بتمعن نجد فيها علما ء كبار وعظماء صغار من حفظه القرآن الكريم ومن طلبه العلم ومن المعلمين كما يوجد من ذكروا هؤ لاء فلابــد ان نذكر الخير والشر كما هوموجود بالفعل اما ان نذكر الشر فقط فهذ ا غيرصيح فلو نظرت يا اخى فى المهاجرين فهى بلـدى موجود بها اروع وافضل قارى قرآن فضيله الشيخ مصطفى خميس وبها الشيخ جمال المغازى والشيخ سالم عبده سالم والشيخ علاء بحر واكبراساتذه فى كل العلوم ومن معلمى القرآن ومدرسين لا ننساهم ابدا ارجو الرد
أخت فاطمة ، أحترم رأيك ، وأنا واثق انك من النص الحلو .. ربنا يهدينا ويهدي شبابها
…………………………………………………..
معاك حق يا كرّووما
………………………….
انا موافق يا خالد .. بس تكتب بيانات الاغنية ، مثلا كلمات فلان تلحين فلان أداء فلان ؛ بالتوفيق
الاول السلامو عليكم
انا خالد البوب مدير جروب اجمد صحاب صحاب كفرالدوار
واحنا عملين اغانى لكفر الدوار وانا محتاج اتكلم مع صاحب هذا الكلام
ممكن نعملو الكلام دة فى اغنية بس طبعا محتاجين موافقة الشاعر اللى كتب الكلام
ياريت الرد يكون فى اقرب فورصة
دة لينك اغنية كفر الدوار للتاكيد
http://www.mediafire.com/?tamlxmtwb2t
ودة لينك الجروب بتعنا
http://www.facebook.com/group.php?gid=288052456968&v=wall
ودة الميل بتاعى
khaled_elbob13@yahoo.com
ارجو الرد سريعا
موافقة
يل جماعة كل بلد فيها الحلو وغيره
المهم نحافظ على اولادنا وربنا يكرمنا بحكومة نظيفة مش نظيف
حسبنا الله ونعم الوكيل
الكلام ده كله مينفعش وانا من كفر الدوار وفيها ناس محترمين يمكن فيها كل اللى اتقال ده لاكن انا واثقه ان نصها احسن بكتير وغلابه وكلنا بنجرى ورا العيش وانا صحافيه واعرف معنى كلامى واللى عنده كلمه يقولها وبتمنى تنشروا كلامى وشكرا